Akanyamakuru ka FDU-Inkingi, Nyakanga 2013

Harya ngo umuhutu wese nasabe imbabazi ? : Dr Jean Baptiste Mberabahizi, Umunyamabanga Mukuru n’Umuvugizi wa FDU-Inkingi
Mu kiganiro yagiranye n’urubyiruko i Kigali, tariki ya 30 Kamena 2013, Pawulo Kagame yongeye kwatura, asubira mu ijambo yavugiye i Kigeme tariki ya 7 Mata 2007, igihe avuga ko ahora yicuza kuba FPR itari ifite imbaraga zihagije ku buryo miliyoni zayicitse zikambuka zikajya muri Kongo, ngo kuko byatumye bagenda « batabarangirijemo umujinya » !
Amaze gusubiramo ko Inkotanyi yari ayoboye zigabije mu baturage zikica ngo « zihorera » bagashobora kuzifata bakazifunga ari 1/100, yavuze ko atumva ukuntu umuhutu wese atasaba imbabazi « kubera abandi bishe mu izina rye » ! Abibwiraga ko gusaza bituma uwari mubi aba mwiza, bakureyo amaso. Nyuma y’imyaka 6, birumvikana ko agifite « ingengabitekerezo ya jenoside ». Kandi siwe gusa. Ingengabitekerezo ya FPR yari isanzwe igaragarira mu bikorwa no mu magambo, ariko bari bataragera aho bakuraho agahu ! Icyaha rero si gatozi kuwagikoze, ahubwo ni gatozi ku bwoko bwose !
Muri urwo rwego kandi, yongeye kwikoma Prezida wa Tanzaniya, avuga ko abantu nkawe atirirwa abasubiza mu magambo, ko yaciye umurongo, ko bene nk’abo iyo bavuze ngo agirane « imishyikirano n’Interahamwe » ngo baba baciye kuri uwo musitari, akaba azabasubiriza aho abategeye, ni ukuvuga mu ntambara, kuko yavuze ko uwo murongo uri « muri politiki, mu mazi, ku butaka no mu kirere ». Muri make, yiteguye intambara n’ingabo za Tanzaniya.
Ngo icyaha cya jenoside ni gatozi ku bahutu bose !
Imvugo ya Pawulo Kagame, asangiye n’abandi bayobozi Leta y’Igitugu ya FPR, byibura irasobanutse. Kuri bo, icyaha si gatozi kuwagikoze, ahubwo kibazwa ubwoko bw’uwagikoze bwose. Icyo Kagame na FPR bashaka rero ni uko buri muhutu wese harimo n’uwavutse uyu munsi, ajya ku rwibutso rwa « jenoside yakorewe Abatutsi bo mu Rwanda » agasaba imbabazi kubera ko bene wabo b’Abahutu bishe Abatutsi !
Mbese u Rwanda ni igihugu kirimo amoko abiri : ubwoko bw’abicanyi, bagomba guhora basaba imbabazi, n’ubwoko bw’abiciwe, bagomba kubahozaho ijisho, kugirango batongera gusubira. Ng’ubwo ubwiyunge bigisha mu « itorero ry’igihugu ».
Ubuzima bw’Abanyarwanda bamwe na bamwe nta gaciro bufite
Inkotanyi zishe abanyarwanda ibihumbi n’ibihumbagiza, ari mu Rwanda, ari muri cyahoze ari Zayire. Ubwicanyi yakoreye muri icyo gihugu cy’abaturanyi cyo, tariki ya 1 Ukwakira 2010, Ishami ry’Umuryango w’Abibumbye Rishinzwe Uburenganzira bwa Muntu, ryasohoye Raporo ivuga ko ibyaha byibasiye inyokomuntu bwahakorewe bugambiriye kwica Abahutu, « bushobora kuba ari jenoside, buramutse busuzumwe n’inkiko ».
None se, aba bahutu bose FPR-Inkotanyi bacitse ku icumu muri ubwo bwicanyi bwose, basaba imbabazi ababiciye ? Cyangwa Pawulo Kagame yumva ko bene abo banyarwanda atari abanyarwanda nk’abandi ?
Hari Abahutu batabarika biciwe n’Interahamwe. Abazwi cyane ni abanyapolitiki bari muri guverinoma y’inzibacyuho yariho muri Mata 1994. Bene wabo se nabo, bazajye gusaba imbabazi kubera ko hari Abahutu bakoze jenoside mu izina ryabo nabo ?
Hari Abanyarwanda, biciwe n’Interahamwe, bicirwa n’Inkotanyi, bamwe bakaba bakomoka mu miryango yari ivanze, irimo Abahutu n’Abatutsi, bamwe bakunze kwita Abahutsi ? Abahutsi se bo bazajya mu ruhe ruhande ? Mu ruhande rw’abazasaba cyangwa abazasabwa imbabazi ubuziraherezo ? Bazaba abande se ? Ninde se uzabasaba imbabazi ?
Hari Abatutsi bari mu nterahamwe, bishe abandi batutsi, ndetse hari n’abo FPR-Inkotanyi yiyiciye ubwayo, kubera imigambi yabaga ifite ya politiki. Umwe muri abo bavugwa ni umugabo Emile Nyungura, ubyara umuhanzi Corneille.  Abishwe se igihe Inkotanyi zicira Abihayimana i Gakurazo, bo bazabasabwa imbabazi ndande ? Abo bose se ntabwo ari abanyarwanda ? Ko nta muhutu se wabiciye, ninde uzabasaba imbabazi ? Hari n’abanyamahanga benshi bishwe, bamwe n’Interahamwe, abandi n’Inkotanyi.
Ngo Prezida Kikwete ategewe ahantu hamwe
Byari bisanzwe bizwi ko Pawulo Kagame atubaha abandi bakuru b’ibihugu, cyane cyane Prezida Kabila wa Republika Iharanira Demokarasi ya Kongo.  Mu mwaka w’i 2001, yigeze kwivovota avuga ko Prezida Museveni yitwara nk’aho u Rwanda ari intara ya Uganda. Abakoraga mu biro bye, batangira kwirirwa bamusebya mu binyamakuru. N’ubwo hagati yabo hasa n’ahari agahenge, bene iyo myifatire ntiyibagirana mu mateka y’imibanire y’ibihugu bihana imbibi. None bigeze aho yita Prezida wa Tanzaniya J.M. Kikwete « umuntu wataye umurongo », « interahamwe », « se w’Interahamwe muri batisimu », n’ibindi kugeza ubwo avuga ko ngo igisubizo yamugeneye azakimuhera « ahantu hamwe ».
Si ubwa mbere mu Karere k’Ibiyaga Bigari, habayeho umukuru w’igihugu witwara bene aka kageni. Muri Uganda, Prezida Idi Amin Dada, yamaze gufata ubutegetsi, agera aho akeka ko ari ikigirwamana. Kimwe na Pawulo Kagame, yari umuntu wize amashuri make cyane, wangaga abajijutse, agakoresha ubugome burenze urugero, kandi akagira imvugo igayitse, idakwiriye umuyobozi akaba na gashozantambara. Muri 1979, Idi Amin Dada yateye Tanzaniya, avuga ko agiye guha isomo Prezida w’icyo gihugu. Byatumye haba intambara hagati ya Uganda na Tanzaniya, yaje kurangira, Idi Amin Dada avuye ku butegetsi. Biragaragara ko Pawulo Kagame arimo kugera ikirenge mu cye !
Amagambo nk’aya ni gashoza ntambara.
Ku muntu witwa ko ari Prezida wa Republika, kuvuga amagambo nk’aya ni igikorwa cya gashozamvururu, amategeko yagombye guhanira, ari agenga igihugu nk’u Rwanda, ari n’agenga imibanire n’ibindi bihugu. Ni amagambo ashingiye ku isumbanishamoko ritagira gitangira. Ni imvugo iranga ingengabitekerezo ishingiye ku moko, itemera imibanire myiza hagati y’abaturanyi, irangwa n’agasuzuguro n’ubwibone bushingiye ku bwoko. Abanyarwanda ntabwo bashobora gukomeza kubyihanganira. Igihe cyo guha igihugu umuganda cyageze. Munyarwanda, munyarwandakazi, iki ni igihe cyo guhitamo. Hitamo neza. Hitamo amahoro. Kuri uyu munsi twagombye kuba twibukaho isabukuru y’Ubwigenge, itandukanye na Pawulo Kagame, inzira zikigendwa, uzane ingufu zawe, maze tubohore u Rwanda.
Dr Yohani Batisita Mberabahizi
Umunyamabanga akaba n’Umuvugizi
Save on DeliciousShare via email
  • Date de parution :