FDU-INKINGI ihamagariye abanyarwanda kwitabira ari benshi imyigaragambyo iteganyijwe i Paris mu bufaransa tariki ya 6 Mata 2012.

FDU-INKINGI IRABAHAMAGARIRA KWITABIRA IMYIGARAGAMBYO ITEGANYIJWE I PARIS TARIKI YA 6 MATA 2012

Tariki ya 10 Mutarama 2012, abacamanza b’abafaransa Marc Trévidic na Nathalie Poux bashyikirije ababuranyi ibikubiye mu iperereza ryakozwe n’inzobere mu bya tekiniki basuzumye ihanurwa ry’indege y’umukuru w’igihugu, tariki ya 6/04/1994 ryahitanye abayobozi b’u Rwanda n’u Burundi, Prezida Yuvenali Habyarimana na Prezida Sipriyani Ntaryamira, abari babaherekeje batandatu hamwe n’abari batwaye iyo ndege batatu bakomoka mu gihugu cy’Ubufaransa.

Ingoma ya Kagame na FPR Inkotanyi, ibinyujije kuri Minisitiri ushinzwe ububanyi n’amahanga Madamu Louisa Mushikiwabo, ibinyamakuru binyuranye byo mu Rwanda, mu Bufaransa, mu Bubiligi ndetse n’ahandi ku isi, byihutiye kuvuga ko ngo « noneho ukuri kwamenyekanye », kuko ngo iperereza ryerekanye ko « indege yahanuwe n’intagondwa zo mu ngabo za Leta » yariho icyo gihe.

Nyamara iyo raporo y’inzobere mu by’amasasu n’amajwi sibyo ivuga. Ndetse ahubwo yemeza ko ubwoko bw’ibisasu byakoreshejwe ari SAM-16 byakorewe mu cyahoze ari Leta Zunze Ubumwe z’Abasoviyeti, nk’uko umucamanza Jean-Louis Bruguière nawe ubwe yari yarabivuze. Icyo iyo raporo ivuga ni uko hari ahantu hatandatu hatandukanye igisasu cyahanuye indege ya Habyalimana gishobora kuba cyararasiwe, harimo n’isambu yari yubatsemo ikigo cya gisirikare cy’i Kanombe. Ni ibyo ngibyo Leta y’igitugu ya Kagame n’abanyamahanga bayishyigikiye bahise basamira hejuru, basakaza hose ko ingo « ibagize abere » kubera ko ngo raporo nshya ije ivuga ko indege yarashwe n’umuntu wari « mu kigo cya gisirikare » i Kanombe.

Muri 2006, umucamanza Jean-Louis Bruguière, nyuma y’iperereza yakoze, we yari yaragaragaje ko igisasu cyahanuye indege cyarasiwe i Masaka, ko Perezida Pawulo Kagame ariwe mugenga w’icyo gikorwa cy’iterabwoba ko kandi cyakozwe na bamwe mu basilikare b’umutwe w’ingabo za FPR-Inkotanyi yayoboraga. Ndetse icyo gihe ubucamanza bwanasohoye inyandiko mpuzamahanga zo gufata abantu icyenda mu byegera bye bya hafi bafatanyije muri icyo gikorwa.

Twibutse ko icyo gikorwa cy’iterabwoba cyo ku itariki ya 6 Mata 1994 ari cyo cyabaye imbarutso ya jenoside n’ubundi bwicanyi ndengakamere byahitanye Abanyarwanda barenga miliyoni. Inkurikizi zacyo kandi zaje kuvamo intambara mu Karere k’Ibiyaga Bigari, cyane cyane mu Burundi no muri Repubulika Iharanira Demokarasi ya Kongo, ako karere kakaba kamaze gupfusha Abakuru b’Ibihugu bane n’abantu bagera kuri miliyoni zirenga esheshatu, kakaba kandi kuzuye abapfakazi n’impfubyi ibihumbi n’ibihumbi, byose bikomoka kuri politiki y’inteko za mpatsibihugu mu rwego rwo kwimika ibikoresho byazo mu Rwanda, ngo babone uko bahindura ubutegetsi muri ako karere no muri Afrika muri rusange.

Kuva muri 94, ukwezi kwa kane, ku buryo bw’umwihariko, kwabaye nk’ukwaziye Abanyarwanda : abantu batabarika barishwe, mu buryo butandukanye, byaba mu gihe cya jenoside n’itsembatsemba muri 94, mu Rwanda, cyangwa nyuma yaho mu irimburwa ry’impunzi i Kibeho muri 95 no muri Republika Iharanira Demokarasi ya Kongo muri 97. Icyunamo cya buri mwaka muri uko kwezi aho kuba impamvu yo kuzirikana abishwe no gushakira hamwe umuti w’ibibazo byakuruye itsembabwoko n’itsembatsemba kugira ngo ritazongera ukundi, kiba impamvu yo guhembera inzangano zihoraho hagati y’inyabutatu nyarwanda.

Muri FDU-INKINGI dusanga ukuri, ubwubahane, ubworoherane n’ubutabera butajegajega ari byo nkingi y’ubwiyunge nyabwo n’amahoro arambye hagati y’Abanyarwanda ndetse no hagati y’u Rwanda n’ibihugu duturanye.

NIYO MPAMVU RERO :

       Kugira ngo twifatanye n’imiryango yose y’ababuze ababo kuva umunsi ririya shyano rigwiriye u Rwanda kugeza aya magingo ;

       Kugira ngo twubahe kandi tuzirikane inzirakarengane zose zazize inkoramaraso izo arizo zose zaduhekuye, ku by’umwihariko izirangajwe imbere na Pawulo Kagame zikomeje kuyogoza igihugu cyacu n’akarere;

       Kugira ngo twamagane ibikorwa by’abagamije kuburizamo ibyatuma ukuri kujya ahagaragara ;

       Kugira ngo dushyigikire ibikorwa n’inzira ziganisha k’ubutabera nyabwo yo nkingi y’ubwiyunge burambye ;

FDU-INKINGI ihamagariye abanyarwanda n’abandi bantu bose basonzeye ukuri n’ubutabera, kwitabira ari benshi imyigaragambyo iteganyijwe i Paris mu bufaransa tariki ya 6 Mata 2012.

Bikorewe i Lyon tariki ya 9 Werurwe 2012

Visi-Perezida wa Mbere wa FDU-INKINGI
Eugène NDAHAYO

 

Dore dokima pdf hano

Save on DeliciousShare via email
  • Date de parution :